Një avion me gjashtë persona në bord u rrëzua mbrëmjen e së mërkurës pranë kryeqytetit të Kilit, Santiago, ndërsa ishte duke transportuar një pacient drejt një zone pranë kufirit verior të vendit, njoftuan autoritetet kiliane.
Sipas një deklarate nga Drejtoria e Përgjithshme e Aviacionit Civil të Kilit (DGAC), kontakti me avionin u humb pranë kodrës El Roble, në zonën Curacaví, rreth 40 kilometra në perëndim të Santiago-s. Njoftimi u bë publik në orën 21:37 me orën lokale (03:37 me orën tone).
Avioni i tipit Piper Cheyenne II, me numër regjistrimi CC-CCC, ishte nisur nga Santiago me destinacion qytetin verior Arica. Në bord ndodheshin gjashtë persona, përfshirë pacientin dhe stafin mjekësor.
Operacionet e kërkimit janë ende në zhvillim, me pjesëmarrjen e forcave ajrore, policisë dhe shërbimeve zjarrfikëse. Zona ku dyshohet se është rrëzuar avioni ndodhet në një terren malor dhe shumë të paarritshëm, gjë që po vështirëson ndërhyrjen.
“Kjo është një zonë me lartësi të madhe dhe jashtëzakonisht e vështirë për të hyrë,” tha kryebashkiaku i Curacaví-t, Cristian Hernández, për një rrjet televiziv kilian. Ai shtoi gjithashtu se operacionet janë penguar edhe nga reshjet e shiut që ranë një ditë më parë në Santiago.
