Rast i pazakontë në Australi: Gruaja lind binjakë me prindër të ndryshëm biologjikë
Një grua nga Queenslandi i Australisë lindi vitin e kaluar dy foshnja që kanë prindër të ndryshëm biologjikë. Besohet se ky është rasti i parë i tillë në Australi dhe aq i rrallë, saqë nuk ishte parashikuar nga ligjet për shtatzëninë surrogate në këtë shtet australian.
Gruaja, identiteti i së cilës është mbrojtur në vendimin gjyqësor, kishte mbetur shtatzënë në mënyrë natyrale afërsisht në të njëjtën periudhë kur, në kuadër të një marrëveshjeje surrogate me një çift tjetër, në mitrën e saj ishte transferuar një embrion i krijuar përmes fekondimit in vitro.
Të dy fëmijët lindën me prerje cezariane në të njëjtën ditë, në nëntor të vitit 2025. Nuk kishte mosmarrëveshje për prejardhjen ose kujdestarinë e tyre. Gjatë muajve të kaluar, secili fëmijë është rritur nga prindërit e tij biologjikë, në familje të ndara.
Megjithatë, rasti kërkoi një procedurë të ndërlikuar pranë Gjykatës së Fëmijëve në Queensland. Ligjet për shtatzëninë surrogate nuk lejojnë ndarjen e “vëllezërve dhe motrave të lindur gjatë të njëjtit lindim”.
Gjykata përfundimisht konstatoi se fëmijët janë “binjakë gestacionalë”, por se, në kuptimin juridik të ligjit për shtatzëninë surrogate, nuk konsiderohen vëlla dhe motër të lindur si rezultat i së njëjtës shtatzëni. Kjo mundësoi që prindërit biologjikë të vajzës të njiheshin zyrtarisht si prindërit e saj.
Si ndodhi rasti?
Sipas vendimit gjyqësor, dy çiftet kishin lidhur një marrëveshje surrogate pa përfitim financiar, pasi ishin njohur përmes miqve të përbashkët.
Njëri çift nuk mund të kishte fëmijë në mënyrë natyrale, sepse gruaja kishte lindur pa mitër. Çifti tjetër kishte pesë fëmijë, ndërsa gruaja ishte pajtuar të bëhej nënë surrogate.
Në prill të vitit 2025, asaj iu implantua embrioni i krijuar përmes fekondimit in vitro. Rreth dy javë më vonë, kontrolli me ultrazë tregoi se ajo mbante dy fetuse.
Testet e mëvonshme gjenetike zbuluan se njëri fëmijë, vajza, ishte fëmija biologjik i çiftit që kishte kërkuar shtatzëninë surrogate. Fëmija tjetër, djali, ishte fëmija biologjik i nënës surrogate dhe partnerit të saj.
Në vendimin gjyqësor thuhet se djali ishte ngjizur veçmas nga procesi i implantimit të embrionit dhe pa ndihmë mjekësore.
“Çifti nuk kishte synuar të krijonte fëmijë në atë periudhë, por kjo në asnjë mënyrë nuk nënkupton se fëmija nuk është i dashur dhe i dëshiruar”, thuhet në vendim.
Fëmijët do të rriten duke e njohur njëri-tjetrin
Të dyja familjet angazhuan një këshilltar të pavarur, i cili përgatiti raportin e nevojshëm për procedurën gjyqësore dhe njohjen formale të prindërve biologjikë të vajzës.
Në raport theksohet se lindja e fëmijëve në të njëjtën ditë dhe lidhja mes tyre mund të kenë rëndësi të përhershme emocionale dhe zhvillimore, pavarësisht se do të rriten në familje të ndryshme.
Familjet deklaruan se synojnë që fëmijët të rriten duke e njohur njëri-tjetrin dhe ta kuptojnë, në mënyrë të përshtatshme për moshën e tyre, vendin që kanë në rrjetin më të gjerë familjar.
Gjykatësja Jodie Wooldridge vendosi se, për shkak të rrethanave unike të rastit, djali dhe vajza nuk konsiderohen juridikisht vëlla dhe motër të lindur nga e njëjta shtatzëni surrogate. Në këtë mënyrë u mundësua bartja ligjore e prindërisë së vajzës te prindërit e saj biologjikë. / Aktuale.mk
