Ju siguroj të gjithëve se do të ketë emra të rinj në “listën e zezë” të SHBA-së, tha ambasadorja amerikane Angela Ageler, duke shtuar se vendi po përballet me një epidemi korrupsioni që duhet parandaluar. Ajo nuk ka treguar se kur dhe me kë do të plotësohet “lista e zezë”, duke thënë se nuk mund të parashikojë se çfarë do të vendosë Uashingtoni.
Lidhur me deklaratën e ish-zëvendëskryeministrit Koço Angjushev, i cili dy ditë më parë u vendos në “listën e zezë” amerikane për shkak të përfshirjes në korrupsion të konsiderueshëm, se do të apelojë një vendim të tillë, Ageler thotë se ka faza dhe mënyra të ndryshme, në të cilat njerëzit që janë në “listën e zezë” mund të raportojnë pakënaqësi.
Pas futjes së Angjyshevit në listën e zezë të SHBA-së, Malta ia hoqi atij titullin konsull nderi i Maltës. “Në funksion të zhvillimeve të tilla, Ministria po i përfundon emërimin me efekt të menjëhershëm dhe po monitoron nga afër zhvillimet e fundit”, tha zëdhënësi i MPJ-së.
Angjushev, ndërkaq, përmes një komunikate ka bërë të ditur se personalisht e ka njoftuar ministrin e Punëve të Jashtme të Maltës për situatën e re dhe se ai vetë është tërhequr. Ai ka falënderuar Maltën për mandatin dhe nderin e të qenit konsull nderi, por siç thotë ai “nuk mund të jem konsull me hije mbi emrin tim”.
“Duke pasur parasysh vendimin e Departamentit të Shtetit ndaj meje, me pretendime me të cilat nuk jam dakord, por që i vlerësoj dhe i pranoj si vendim, nuk e konsideroj se mundem dhe as Malta nuk duhet të ketë Konsull Nderi me hije në emrin e tij, sado e pajustifikuar të jetë ajo. Derisa këto akuza të korrigjohen, nuk jam i gatshëm dhe nuk jam në gjendje të avokoj në emër të ndonjë shteti apo institucioni. Vendimi për kufizimin e hyrjes në SHBA është diçka që më shqetëson mua personalisht dhe me këtë çështje duhet të merrem personalisht, pa asnjë pasojë negative për vendet mike, individët, bashkëpunëtorët afarist apo institucionet”, thuhet në reagimin e Angjushevit. Më 5 dhjetor, Departamenti i Shtetit e shpalli Angjushevin të papërshtatshëm për të hyrë në Shtetet e Bashkuara, për shkak të përfshirjes së tij në nivele dukshëm të larta të korrupsionit.
