Në një situatë kur e gjithë bota është nën panikun e koronavirusit, ka reaguar edhe këngëtari i njohur Alban Skënderaj përmes një postimi në “Instastory”, ku shpreh se ky virus ka mbërritur në Shqipëri dhe mund të ketë raste me shumicë. Ai shpreh se nuk është fare çudi që nga Shqipëria të ketë shkuar në Itali por patjetër dhe e kundërta.
“Nuk dua të trazoj njeri por kam disa ditë që e mendoj. Edhe pse jam totalisht inekspert në fushë dhe ndoshta është thjesht fantazi por nuk e di pse kam ndjesinë se në Shqipëri ka koronavirus, pa u vërejtur është përhapur në masë tashmë. Shoh që njerëz (duke përfshirë dhe mua) të gjitha moshave ankohen për simptoma gripi si rrallë herë më parë dhe në mënyrë të përsëritur. Me sa kam lexuar koronavirusi në shumicën e rasteve vjen pa simptoma, në raste të tjera me simptoma shumë të ngjashme me një rrufë, ftohje apo grip dhe në raste të rralla me komplikime. Pra nuk do të ishte çudi që nga Shqipëria të ketë shkuar në Itali por patjetër dhe e kundërta. E vetmja gjë që rrëzon këtë teori është që nuk ka patur ndonjë rast të komplikuar në personat e moshuar ose të sëmurë rëndë. Pra mund të jetë vërtetë kjo e imja fantazi apo teori konspirative. Gjithësesi nëse do të ishte e vërtetë të paktën do të tregonte që ky virus nuk është edhe kaq i rrezikshëm dhe i frikshëm sa të gjithë mendojmë”, shkruan Albani. 
