Ish-prokurori i përgjithshëm i Moldavisë, Alexandr Stoianoglo po kryeson sondazhet me një diferencë të vogël në balotazhin presidencial të vendit, sipas rezultateve paraprake të shpallura sonte.
Komisioni Qendror i Zgjedhjeve (KQZ) i Moldavisë njoftoi se Stoianoglo kryeson me pak më shumë se 51%, ndërsa presidentja aktuale Maia Sandu qëndron në më shumë se 48% me rreth 86% të votave të numëruara.
Votimi në balotazhin e zgjedhjeve presidenciale filloi në orën 7 të mëngjesit me orën lokale (05:00 GMT) dhe vazhdoi deri në orën 21:00, në 2219 qendra votimi, 231 prej të cilave ndodheshin jashtë vendit në 37 vende.
Sipas KQZ-së, gati 1.7 milionë qytetarë të vendit kanë hedhur votën e tyre pas përfundimit të votimit, që korrespondon me pak më shumë se 54% të elektoratit.
Rezultatet përfundimtare pritet të shpallen në një konferencë shtypi të hënën në orën 10:00. /AA
