Sonte në Negotinë të Komunës së Vrapçishtit dega e BDI-së organizoi Mbledhje me popullin ku ishte prezent edhe lideri Ali Ahmeti si dhe funksionarë të lartë të Bashkimit Demokratik për Integrim.
Para qindra anëtarëve e simpatizantëve Kryetari Ali Ahmeti nga Vrapçishti porositi: Vrapçishti dhe mbarë populli shqiptar do ta mbroj gjuhën shqipe që me gjak e sakrificë është fituar. Shqiptarët nuk do ta tolerojnë këtë. Do t’i bllokojnë rrugët e Maqedonisë së Veriut. Presim që gjatë mbledhjes së përbashkët me Qeverinë e Maqedonisë së Veriut, Qeveria e Republikës së Kosovës ta ngris çështjen e gjuhës shqipe. Reagim presim edhe nga të gjitha partitë në Kosovë, siç presim reagim edhe nga Tirana.
Gjithashtu, në mbledhjen e sontme me popullin në Komunën e Vrapçishtit u nënvizua se partitë politike shqiptare, të gjitha pa përjashtim, e kanë për obligim për të mbrojtur gjuhën shqipe, pasi kjo çështje i tangon të gjithë. Shfuqizimi i përkatësisë etnike, duke u udhëhequr nga një menatalitet që nuk sjellë asgjë të mirë, largimi padrejtësisht i shqiptarëve nga institucionet, zhbërja e të arriturave në të gjitha fushat, drejtësia selektive janë të papranueshme absolutisht.
Iu bëjmë thirrje humbësve të zgjedhjeve të mos i legjitimojnë politikat e dëmshme, që na kthejnë mbrapa dhe nxisin përkeqësim qenësor të marrdhënieve ndëretnike. Le t’i braktisin institucionet, mos të bëhen pjesë e turpit.
