Tetova i ka bërë të gjitha përgatitjet për qendrën rajonale për vaksinim kundër Covid-19, bën të ditur kryetarja e Tetovës, Teuta Arifi. Qendra për vaksinim në Tetovë do të jetë tek salla e shkollës së mesme të mjekësisë, ndërsa kapaciteti i saj për vaksinim do të jetë 1000-1500 persona në ditë, kryesisht banorë të Pollogut. Vaksinimi pritet të nisë pas arritjes së 200 mijë vaksinave nga Kompania kineze “Sinofarm”.
“Është caktuar salla e shkollës së mesme të mjekësisë. Shtëpia e shëndetit publik do të bëjë vaksinimin. Ne kemi organizuar teknikisht të gjitha kushtet e brendshme, kompjuterë, serverë, stafi që do ndihmojë dhe kështu me radhë. Parashikimet janë që nga java tjetër me fillimin e vaksinimit, kapacitet është që mund të vaksinohen 1000-1500 persona në ditë. Qëllimi do të jetë që të përdoren vaksinat që shteti pritet t’i marrë nga kompania “Sine For”.”,- deklaroi kryetarja e komunës së Tetovës, Teuta Arifi.
