Kreu i Bashkimit Demokratik për Integrim, Ali Ahmeti është takuar me kryetarin aktual të Strugës, Ramiz Merko. Nga burime partiake TV21 mëson se mes tjerash, në takim është biseduar edhe për zgjedhjet lokale që do të mbahen në vjeshtë.
Mësohet se kreu i BDI-së ka kërkuar që Merko të mos kandidohet për edhe një mandat tjetër, ndërsa sipas të njëjtave burime, Merko e ka pranuar kërkesën e Ahmetit me një kusht, që kandidat i integristëve për këtë komunë mos të jetë Jeton Shaqiri
Struga është një nga komunat ku pritet të ketë betejë të fortë në zgjedhjet lokale. Partitë ende nuk kanë zbuluar kandidatët, por ka disa emra që përfliten, që mund të jenë kandidatë për kryetar të kësaj komune.
Si kandidat potencial përmendet emri i kirurgut abdominal Fesih Shehu, por edhe i ish-ministrit të Arsimit, Jeton Shaqiri. Mandej përmendet edhe Faton Pollozhani, ish zv/ministër i Transportit.
Në garë mund të futet edhe Garip Kaba, zëvendësdrejtor aktual i Drejtorisë së Doganave, ndërkaq përmendet edhe emri i deputetit Salim Sulejmani.
Emra të tjerë që përfliten janë edhe Vegim Zhaku nga Dollogozhda, si dhe
Mendi Qyra, kryetari aktual i OEMVP-së.
Por, nuk përjashtohet edhe rikandidimi i Zijadin Selës, i cili më herët kishte drejtuar këtë komunë.
Kujtojmë se në zgjedhjet parlamentare në maj të vitit të kaluar, Fronti Europian, pjesë e të cilit është BDI dhe ASH-Sela, mori 10,250 vota, koalicioni VLEN kishte 4.600 vota ndërsa VMRO-DPMNE-ja 6,950 vota, kurse LSDM-ja 2.500 vota./tv21.tv
