Ish-deputeti i Partisë Demokratike Bardh Spahia u ndalua mbrëmjen e djeshme teksa ishte duke shkuar në studiot e një tëlevizioni, pasi paraditen e djeshme në media u shpërnda lajmi se ai ishte në kërkim, për aktet e dhunës që u shënuan në një prej KZAZ-ve në Shkodër pasditen e së martës.
Me gjasë në policinë e Tiranës, Spahisë i është komunikuar masa e arrestit, dhe ndoshta duhet të pritet seanca e radhës që kjo masë të rivlerësohet.
Burime bëjnë me dije se Spahia ndodhet ende në Drejtorinë vendore të Policisë së Tiranës, dhe ende nuk është bërë transferimi i tij në Shkodër nga frika e një përplasje mes efektivëve dhe mbështetësve të PD-së që gjendeshin dje përpara komisariatit në Shkodër.
Teksa ishin në pritje të mbërritjes së Spahisë mesnatën e djeshme, kreu i PD-së në Shkodër, Xhevdet Amuli akuzou kryeministrin Rama dhe ministrin Lleshaj se arrestimi i ish-deputetit është politik, ndërsa bëri thirrje për lirimin e tij, pasi kjo situatë po çon vendin në kaos dhe luftë civile.
“Arrestimi është politik, që kanë realizuar edhe etërit e tyre. Shkodra nuk nënshtrohet nga arrestimet partiake. Të ndalohen një minutë e më parë arrestimet, pasi po e con vendin në kaos dhe luftë civile në këto zgjedhje që mendon që ti mbajë. Drejtuesit e policisë së Shkodrës nuk kanë asgjë në dorë, pasi ndryshe flasin dhe ndryshe veprojë.
Cdo gjë është në dorë të kryeministrit dhe ministrit Lleshaj. Bardh Spahinë e kanë akuzuar për problemet në Shkodër, por Lleshaj ka ndryshuar mendje dhe e kanë mbajtur atje për arsye sigurie. Sipas ministrit është person i rrezikshëm. Ardhja e Ramës e nxit akoma më shumë këtë protestë”, tha ai.
Për arrestimin e Spahisë reagoi dhe kreu i PD-së Lulzim Basha, i cili tha se asgjë nuk do ta ndalte këtë forcë politike, në luftën kundër blerësve të votave dhe kriminelëve.
