Deri në fund të marsit duhet të publikohet drafti fillestar i Tarifës Doganore me rregullime të caktuara të normave doganore siç kërkohen nga kompanitë, ndërsa drafti për kalendarin tatimor mund të pritet javën e ardhshme, tha sot Ministri i Financave, Fatmir Besimi në takimin punues në Odën Ekonomike të Maqedonisë.
Besimi theksoi se vendi do të duhet t’i harmonizojë plotësisht normat doganore me ato të BE-së kur të bëhet anëtar i saj, por megjithatë do të shikojë edhe tani, në bashkëpunim me odat, të hartojë pakon më të përshtatshme.
“Më 17 nëntor, në seancë qeveritare, formohet një grup punues i cili është në komunikim të vazhdueshëm me anëtarët e odave. Sipas dinamikës, duhet të ketë deri në fund të marsit një draft fillestar ose ndoshta një ose dy javë më vonë. Ne po shkojmë me harmonizimin e nomenklaturës, por edhe me faktin se ishte një kërkesë e investitorëve të caktuar në drejtim të harmonizimit të normave doganore. Ne kemi disa norma doganore që janë më të ulëta ose më të larta se ato në BE. Ne do të shohim, në drejtim të rritjes së konkurrencës, t’i harmonizojmë ato”, tha Besimi.
Për draftin për kalendarin tatimor kujtoi se tashmë është ndarë me odat ekonomike.
“Nëse është dakord, tashmë javën tjetër mund ta ketë publikuar në ueb faqen”, theksoi ministri.
Në takimin e punës u diskutuan më shumë çështje të rëndësishme për ekonominë.
Siç theksoi Kryetari i Odës, Branko Azeski, për momentin janë të rëndësishme ndryshimet në Kodin Doganor, detyrat parafiskale dhe çështja për holdingun, të cilat ishin tabu për dhjetë vjet.
“Ne e filluam mandatin e kësaj qeverie me një rezultat të keq për ne dhe ne në çdo takim me Besimin e shohim atë rezultat. Nga aplikimet e paraqitura, 50 për qind u refuzuan, ndërsa 10 për qind u pranuan, por kishte mëngjes si një shpërblim ngushëllimi. Tani, në takimin e fundit, nuk kishte mëngjes, kishte vetëm ujë të thartë, por kërkesat për sa i përket pranimit janë 50:50”, tha Azeski.
Paraprakisht, para fillimit të diskutimit, zëvendëskryeministri Fatmir Bytyqi theksoi se Qeveria vazhdon me punën e saj transparente dhe hapjen e të gjitha çështjeve, pa marrë parasysh sa “të dhimbshme” dhe të vështira janë, ndërsa odat i sheh si partnerë të saj dhe si aktorë në krijimin e politikave.
“Vetëm me këtë qasje, përmes partneritetit dhe dialogut, ne mund të arrijmë një mjedis të parashikueshëm të biznesit. Më e rëndësishmja, nuk ka asnjë tabu, nuk ka tema që nuk mund të hapen pavarësisht nëse ajo kërkon një, dy, pesë ditë apo mijëra takime. Duhet të ulesh, të flasësh për gjithçka dhe të gjesh zgjidhje. I hapim çështjet të cilat ndoshta më shumë se 10 vjet nuk janë hapur. Qeveria është e hapur për të gjitha çështjet, ndërsa Ministria e Financave reagon shpejt dhe sjell zgjidhje ligjore”, nënvizoi Bytyqi.
