Futbollisti i skuadrës së Superligës zvicerane Cyrih Bledian Krasniqi (23) ka vendosur të luajë për kombëtaren e Kosovës, raporton Blick.
Krasniqi shkëlqeu për kryesuesin e ligës zvicerane edhe në duelin e së shtunës së kaluar kundër Servette në fitoren 1:0.
“Blediani mund të bëjë përparim këtë sezon dhe të bëhet një top lojtar dhe lider. Ose do të mbetet një talent i përjetshëm”, tha trajneri Ricardo Moniz (60) kohët e fundit.
Trajneri i Kosovës Franco Foda e kishte tërhequr intensivisht Krasniqin muajt e fundit. Sipas informacioneve të Blick, futbollisti 23-vjeçar ka vendosur pas shqyrtimit të kujdesshëm që në të ardhmen të veshë fanellën e Kosovës.
Foda dhe Krasniqi e njohin njëri-tjetrin nga koha e tyre e përbashkët në Cyrih në vitin 2022. Krasniqi, i cili kaloi nëpër të gjitha ekipet e të rinjve të Zvicrës dhe luajti 38 ndeshje për Zvicrën, aktualisht ka pasaportë zvicerane.
Në kombëtaren e Kosovës, futbollisti i Cyrihut do të takojë fytyra të njohura si Donat Rrudhani, Florent Hadergjonaj, Andi Hoti, Mirlind Kryeziu dhe Arijanet Muriç. Ylli i skuadrës është ish-lojtari i FCB-së Edon Zhegrova, i cili tani ka vlerën e tregut prej 25 milionë euro sipas transfermarkt.
