Në emisionin “Balkan Talks” të EURONEWS, i pari i Diplomacisë së vendit, Bujar Osmani ka folur për zgjedhjet lokale në Maqedoninë e Veriut, për Raportin e KE-së për vendin dhe sfidat e shtetit në përgjithësi.
Sipas Osmanit rezultatet e fundit në zgjedhjet parlamentare nuk duhet të jenë arsye për zgjedhje parlamentare dhe se të njëjtat janë të parëndësishme, për faktin se ndërprejnë proceset vitale shtetërore.
“Maqedonia e Veriut në 10 vitet e fundit pothuajse çdo vit ka zgjedhje; qofshin presidenciale, parlamentare a lokale. Ju e dini se në moment kur ka zgjedhje ju shtypni butonin për pauzë në proceset shtetërore e shoqërore. Shtetit i duhet një periudhë prej 2-3 vjetësh pa zgjedhje për t’u fokusuar në tejkalimin e disa çështjeve të rëndësishme”, tha mes tjerash Osmani.
Kryediplomati Osmani është deklaruar edhe për thirrjen e Arben Taravarit që elektorati i ASH-së të votojë në raundin e dytë për secilin kundërkandidat të BDI-së, duke nënkuptuar se duhet votuar edhe një maqedonas para një kandidati shqiptar.
“BDI asnjëherë nuk ka vënë në pyetje interesin kombëtar karshi interesave partiake. Ne kërkojmë mbështetjen e gjithë qytetarëve, por në Kërçovë është e rëndësishme të fitojë Fatmir Dehari, e rëndësishme në Haraçinë të fitojë Ridvan Ibrahimi, e rëndësishme në Vrapçishtë të fitojë kandidati që e fitoj kandidatin e BDI-së. Këto janë qëllime që s’kanë të bëjnë me interesa partiake”, deklaroi Osmani.
