Ministria e Shëndetësisë njoftoi të enjten se tetë persona kanë vdekur dhe janë regjistruar edhe 2.236 raste me COVID-19, që është një rekord i ri sa i përket infektimeve ditore me koronavirus.
Viktimat ishin nga Komuna e Prishtinës, Vitisë, Istogut, Prizrenit, Zubin Potokut, Pejës, Dragashit dhe Mitrovicës.
Shifrat e rasteve të reja dalin pas testimit të mostrave të 11.373, që i bie rreth 20 për qind e të testuarve kanë dalë pozitivë me koronavirus.
Sipas njoftimit, në grupmoshën 20-29 vjeç kanë dalë pozitivë 569 persona, ndërkaq sa i përket komunave, Prishtina ka regjistruar më së shumti raste, përkatësisht 285 të infektuar.
Në 24 orët paraprake janë shëruar edhe 138 pacientë, që çon në 106.546 numrin e përgjithshëm të të shëruarve.
Prej 13 marsit 2020, deri më 19 gusht 2021, Kosova ka regjistruar 123.098 raste me COVID-19. Prej kësaj shifre, 2.303 raste kanë përfunduar me fatalitet.
Raste aktive janë 14.249.
Ndërkaq, sa i përket fushatës së vaksinimit, gjatë 24 orëve paraprake janë administruar 22.119 doza të vaksinës.
Që prej fillimit të vaksinimit në fundin e marsit, deri më tani në Kosovë janë administruar 644.212 doza të vaksinës, ku 221.026 persona janë vaksinuar plotësisht, me të dyja dozat.
Për shkak të përkeqësimit të situatës epidemiologjike ditëve të fundit, Qeveria e Kosovës ka miratuar masa të reja kufizuese që do të hyjnë në fuqi më 20 gusht.
Ministri i Shëndetësisë në Kosovë, Arben Vitia.
LEXONI EDHE KËTË:
Qeveria miraton masat e reja dhe angazhon staf shtesë shëndetësor
Ndër masat kryesore janë ndalimi i punës së klubeve të natës, ndalimi i ahengjeve familjare, shkurtimi i orarit të punës së gastronomisë deri në ora 22:30 dhe mbajtja e maskës në ambiente të mbyllura dhe në transportin publik.
