Kryetari i parlamentit grek Nikos Vucis ka planifikuar të caktojë një seancë të martën për votëbesimin e Qeverisë, njoftoi agjencia greke ANA-MPA. Vucis do ta paraqesë këtë propozim nesër në një takim me nënkryetarin e parlamentit.
Në një konferencë me gazetarët, kryetari i parlamentit njoftoi se kryeministri grek Alexis Cipras dërgoi një letër duke e informuar atë se ai synon të kërkojë ripërtëritjen e besimit të Parlamentit.
Debati për votëbesimin duhet të fillojë dy ditë pas dorëzimit të kërkesës dhe nuk duhet të zgjasë më shumë se tre ditë, dhe sipas kësaj, Vucis do të propozojë seancën që të fillojë të martën ose më së voni të mërkurën.
Pas dorëheqjes së partnerit të koalicionit dhe ministrit të mbrojtjes, Panos Kamenos, kryeministri grek Alexis Cipras kërkoi një votëbesim.
