Njerëzit e rrezikuar dhe ata mbi moshën 60 vjeç duhet të marrin një dozë të dytë përforcuese të vaksinës kundër COVID-19.
Kështu kanë këshilluar të hënën agjencitë shëndetësore evropiane, duke paralajmëruar se një valë e re po “bëhet më e fortë”, shkruan Euronews.
Njerëzit mbi moshën 80 vjeç, punonjësit e kujdesit shëndetësor dhe stafi në institucionet e kujdesit afatgjatë që plotësojnë kriteret e cenueshmërisë ose moshës janë tashmë të pranueshëm për një dozë të dytë përforcuese, por Qendra Evropiane për Parandalimin dhe Kontrollin e Sëmundjeve (ECDC) dhe Agjencia Evropiane e Barnave (EMA) bëri thirrje në një deklaratë të përbashkët të hënën që masa të shtrihet për njerëzit e cenueshëm dhe njerëzit mbi 60 vjeç.
“… Vendet duhet të konsiderojnë një furnizim të shpejtë të dozave të dyta përforcuese me vaksinat aktualisht të disponueshme. Këto mund të administrohen të paktën katër muaj pas asaj të mëparshme, me fokus te njerëzit që kanë marrë një përforcues të mëparshëm më shumë se 6 muaj më parë”.
Ata nënvizuan se për momentin, “nuk ka asnjë provë të qartë epidemiologjike për të mbështetur administrimin e një doze të dytë përforcuese në individët nën moshën 60 vjeç, përveç nëse ata kanë dobësi mjekësore”.
Një thirrje e tillë vjen pasi Evropa përballet me ritme në rritje të pranimeve në spitale dhe në njësinë e kujdesit intensiv në mes të një vale të re të COVID-19.
“Këto të dhëna sinjalizojnë se një valë e re COVID-19 po rritet në të gjithë Bashkimin Evropian/Zonën Ekonomike Evropiane”, thuhet në deklaratë.
Në javën që përfundoi më 3 korrik, shkalla 14-ditore e njoftimit të rasteve për BE/ZEE ishte 921.2 për 100,000, një rritje e mprehtë nga shkalla 715 e vërejtur një javë më parë.
