Nuk ka marrëveshje – Lëvizja Vetëvendosje dhe LDK-ja nuk kanë arritur që të merren vesh që të nënshkruajnë koalicionin për bashkëqeverisje.
Këtë e ka bërë të ditur kryetari i Lëvizjes Vetëvendosje, Albin Kurti, përmes një videoje që e ka postuar në Facebook.
Kurti ka deklaruar se LDK-ja e ka refuzuar ofertën e tij – që përmbante tri pika – mbrëmë.
Ai në këtë video thotë se në seancën e nesërme konstituive të Kuvendit do të shkohet pa marrëveshje VV-LDK, pasi këto dy parti nuk janë marrë vesh për ndarjen e posteve.
“Kisha planifikuar që sot të takoj deputetët e pakicave dhe ta mbajmë edhe mbledhjen e jashtëzakonshme të Këshillit të Përgjithshëm të Vetëvendosjes. Mirëpo, këto u pamundësuan nga refuzimi i mbrëmshëm i ofertës time për koalicionin qeverisës duke na dërguar nesër në Kuvend të Republikës pa marrëveshje për qeverinë”.
“Është obligim i imi moral e politik, shtetëror e kombëtar, qytetar e njerëzor, që t’ju njoftoj se në seancën inauguruese të legjislaturës së shtatë do të shkojmë pa dakordimin për qeverinë. Marrëveshjes për programin qeverisës nuk kemi mundur t’ia bashkangjesim edhe atë për ndarjen e përgjegjësive”.
Lëvizja Vetëvendosje dhe LDK-ja tash e sa kohë kishin zhvilluar takime në përpjekje për të arritur një marrëveshje, por duket se megjithatë nuk arritën t’i tejkalojnë pengesat.
Posti i presidentit shkaktoi ngërç në bisedimet mes këtyre dy partive, gjë që duket se e pamundësoi edhe arritjen e koalicionit qeverisës VV-LDK.
