Drejtori i Agjencisë për Zbatimin e Gjuhës, Ylber Sela, sot u takua me Presidentin e Republikës së Maqedonisë së Veriut, Stevo Pendarovski.
Takimi u fokusua në kushtet lidhur me zbatimin e Ligjit mbi Përdorimin e Gjuhëve nga institucionet publike në Republikën e Maqedonisë së Veriut.
Drejtori Ylber Sela e informoi Presidentin Pendarovski për aktivitetet e deritanishme të realizuara, si dhe sfidat dhe planet e Agjencisë gjatë zbatimit të Ligjit. Ai theksoi rëndësinë e zbatimit të Ligjit nga ana e Institucionit të Presidentit të Republikës së Maqedonisë së Veriut dhe shprehu se beson që institucionet e tjera në vend së shpejti do të rregullojnë veprimet e tyre sipas Ligjit mbi Përdorimin e Gjuhëve.
Të dy bashkëbiseduesit në përfundim thanë se respektimi i Ligjit mbi Përdorimin e Gjuhëve jep një kontribut të rëndësishëm në zhvillimin dhe kultivimin e bashkëjetesës ndëretnike, si dhe në arritjen e objektivave strategjike të Republikës së Maqedonisë së Veriut, anëtarësimin e plotë në NATO dhe Bashkimin Evropian.
Foto: Pretsedatel.mk
