Mëngjesin e sotëm, për të dytën ditë radhazi ranë kuotat e aksioneve në bursat evropiane, ndërkohë që kursi i euros kundrejt dollarit ra në nivelin më të ulët në 20 vjet, pasi rreziku i një recesioni në Evropë po rritet për shkak të krizës energjetike.
Indeksi STOXX 600 i aksioneve kryesore evropiane ra 0.2 për qind në orën 9:30 të mëngjesit, duke u dobësuar për të dytën ditë radhazi.
Në të njëjtën kohë, indeksi FTSE i Londrës ra me 0,47 për qind, në 7,498 pikë, ndërsa DAX i Frankfurtit u dobësua me 0,07 për qind, në 13,224 pikë, dhe CAC i Parisit 0,22 për qind, në 6,364 pikë.
Investitorët ishin të zhgënjyer nga rënia e mprehtë e djeshme në Wall Street. Dow Jones ra me 1.91 për qind, ndërsa S&P 500 u ul me 2.14 për qind dhe indeksi Nasdaq 2.55 për qind.
Në javët e fundit, tregjet janë mbështetur nga shpresat e investitorëve se për shkak të një rënie të lehtë të inflacionit në SHBA nga nivelet më të larta në më shumë se 40 vjet, banka qendrore e SHBA do të jetë më pak agresive në rritjen e normave të interesit në të ardhmen.
