UEFA e ka shtyrë ndeshjen kualifikuese për Kampionatit Evropian për femra që mbahet në vitin 2021 mes Kosovës dhe Rusisë.
Ka qenë faqja web e Federatës së Futbollit të Rusisë që e ka publikuar lajmin.
“UEFA i ka treguar RFU-së për shtyrjen e ndeshjes kualifikuese CH2021 midis ekipeve kombëtare të femrave të Kosovës dhe Rusisë, të planifikuar për 4 tetor në Prishtinë”.
“Ky vendim u mor për arsye sigurie. Data dhe vendi i ndeshjes do të përcaktohet më vonë, pas përfundimit të kontrolleve shtesë”, thuhet në komunikatën e Federatës së Futbollit të Rusisë.
Ende nuk ka asnjë reagim nga FFK-ja për anulimin e kësaj ndeshje.
Kosova dhe Rusia janë në Grupin A, në turneun kualifikues të Kampionatit Evropian.
Rusia ka 6 pikë dhe ndajnë vendin e parë në grup me holandezët. Kosova ka 3 pikë dhe është në vendin e 4-të.
