Ndeshja e sotme mes Republikës Çeke dhe Danimarkës, ka përfunduar me fitoren e kësaj të fundit.
Danezët fituan 2-1 ndaj Republikës Çeke në Baku të Azerbajxhanit dhe shkojnë në fazën tjetër, teksa do të përballen me fituesin e çiftit Ukrainë-Angli. Danimarka bëhet kështu gjysmëfinalistja e tretë e Euro 2020.
Ndeshja është zhbllokuar që në minutën e pestë. Delaney shënoi për danezët. Danimarka dyfishoi në fundin e pjesës së parë. Dolberg finalizoi në mënyrën e duhur një aksion të bukur. Merita i shkon edhe Maehle, autor i një super asisti me të jashtmen.
Çekia ngushtoi në 1-2 sapo nisi pjesa e dytë. Patrick Schick gjen cepin e portës dhe arrin Cristiano Ronaldo-n me 5 gola. Ishin minuta të mira për çekët, por më pas danezët rimarrin veten dhe arrijnë të mbrojnë fitoren deri në fund. Me tre golat e sotëm, ky Evropian ka mesataren më të mirë, 2.75 gola për ndeshje.
