Kryetari i komunës së Çairi, Visar Ganiu thotë se po hasin në pengesa pasi kanë angazhuar kompani të licencuar për largimin e mbeturinave jashtë kontejnerëve në territorin e komunës, shkruan TV21. Ganiu thotë se kjo po bëhet me tendencë politike, nga kuadro të BDI-së që udhëheqin me NP “Higjiena Komunale”, në kuadër të Qytetit të Shkupit.
“Do të thotë ditën e parë që ka filluar kamioni mbrapa nesh të punojë dhe ju jeni dëshmitarë nuk ka asnjë orë që kam shpall që ne filluam me punë dhe që Çairi do të jetë i pastër, për shkak se ne do të ndihmojmë, pa u marrë me Qytetin e Shkupit, pa u marrë me ndërmarrjen në fjalë, dmth menjëherë qyteti i Shkupit e ka dërguar Inspektoratin, e ka bllokuar kamionin, ka thirru asistencë policore dhe tani dëshiron ta konfiskojë kamionin, për arsye të tyre, që ne nuk i dimë”, tha mes tjerash Ganiu.
Ganiu thotë se do ta ndërpresin punën, në rast se Higjiena Komunale shton kapacitetin e kontejnerëve për mbeturina.
“Përgjigja është shumë e thjeshtë, nuk do ndonjë formulë, ose me qenë ndonjë matematicient i mirë për ta përllogaritur. 530 kontejnerë kanë qenë kur ka qenë z.Ragip Doçi drejtor në Higjienën Komunale, sot janë 320 në komunën e Çairit. Dmth dikush investon në atë drejtim që të ketë këtë pasqyrë komuna e Çairit, në të gjitha anët, në çdo kënd kemi mbeturina”, pohoi Ganiu.
