Shefi i shtabit të vëllait të presidentit të rrëzuar të Sirisë, Bashar al-Assad, u gjet i vdekur në zyrën e tij pranë kryeqytetit Damask, njoftoi sot Observatori Sirian për të Drejtat e Njeriut.
Organizata joqeveritare me bazë në Britani tha se gjeneralmajor Ali Mahmoud, shefi i shtabit të Maher Assad, udhëhoqi një operacion ushtarak në Sirinë jugore në vitin 2018, raporton Associated Press.
Në videon e përhapur në rrjetet sociale, shihet se Mahmoud është ulur në një karrige i mbuluar me gjak dhe duket se rrobat i janë djegur, sipas AP.
Drejtori i Observatorit Sirian për të Drejtat e Njeriut Rami Abdurahman tha se nuk ishte e qartë nëse Mahmoud u vra nga Maher Assad apo kreu vetëvrasje.
Maher Assad drejtoi Divizionin e Katërt të Blinduar të Ushtrisë Siriane, i cili ka luajtur një rol të madh në luftën civile të Sirisë që nga fillimi i saj në mars 2011.
Bashar al-Assad, i cili ka sunduar Sirinë që nga viti 2000, iku në Moskë dje dhe mori azil nga Rusia, disa orë pasi rebelët morën kontrollin e Damaskut.
