Furnizimi me gaz rus në Gjermani nëpërmjet gazsjellësit Nord Stream 1 në Detin Baltik është ndërprerë për 10 ditë.
Operatorët e tubacionit të mbështetur nga Rusia thonë se masa është për shkak të punës vjetore të mirëmbajtjes.
Por ministrat gjermanë besojnë se mbyllja është e motivuar politikisht për të ushtruar presion mbi Berlinin.
Muajin e kaluar, ministri gjerman i ekonomisë Robert Habeck tha se presidenti rus Vladimir Putin po përdor gazin “si armë” në përgjigje të sanksioneve të BE-së.
Në mesin e qershorit, firma shtetërore ruse e gazit Gazprom shkurtoi rrjedhat e gazit përmes Nord Stream 1 në vetëm 40% të kapacitetit të tubacionit. Ai fajësoi një vonesë në kthimin e pajisjeve që po servisoheshin nga Siemens Energy e Gjermanisë.
Qeveria kanadeze thotë se tani do të kthejë një turbinë të riparuar Siemens në Gjermani për tubacionin. Ky veprim zemëroi qeverinë ukrainase, e cila akuzoi Kanadanë për përshtatjen e sanksioneve të vendosura ndaj Moskës “për tekat e Rusisë”.
Kanadaja thotë se po i jep Siemens Kanadasë një “leje të kufizuar dhe të revokueshme” për të dërguar turbinat e riparuara në Gjermani, pavarësisht sanksioneve.
Qeveria gjermane është e shqetësuar se furnizimet me gaz mund të reduktohen ose të ndërpriten përgjithmonë.
Mbyllja e tubacionit po prek gjithashtu Italinë, ku grupi energjetik Eni tha se do të merrte rreth një të tretën më pak gaz nga Gazprom i Rusisë të hënën krahasuar me vëllimet mesatare të furnizuara gjatë ditëve të fundit.
Kreu i Agjencisë Ndërkombëtare të Energjisë, Fatih Birol, ka paralajmëruar se Rusia mund të ndërpresë plotësisht furnizimin me gaz në Evropë dhe se Evropa duhet të përgatitet tani.
Rusia tashmë ka shkurtuar furnizimet me gaz për Poloninë, Bullgarinë, Holandën, Danimarkën dhe Finlandën për shkak të refuzimit të tyre për të respektuar një skemë të re pagese.
Që nga pushtimi rus i Ukrainës në shkurt, Gjermania ka reduktuar varësinë e saj nga gazi rus nga 55% në 35% dhe dëshiron të ndalojë plotësisht përdorimin e gazit nga Rusia.
Por nëse furnizimet ruse ndërpriten papritur brenda natës, kjo mund ta çojë Gjermaninë në një recesion të madh, sepse industri të tëra mbështeten në gaz dhe shumica e shtëpive gjermane e përdorin atë për ngrohje.
Familjet gjermane dhe shërbimet kryesore si spitalet do të kenë prioritet për furnizimin me gaz sipas një plani emergjence të qeverisë.
