Zv.kryeministri i parë i RMV-zë, Artan Grubi, ka deklaruar se zgjedhjet parlamentare mund të mbahen në prill të vitit 2024 bashkë me ato presidenciale, shkruan gazeta LAJM. Këto komente Grubi i ka bërë sot, gjatë ekspozesë me rastin e 100 ditëve të para të Qeverisë, duke i’u përgjigjur opozitës e cila kërkon që këtë vit të mbahen zgjedhjet e parakohshme parlamentare.
“Bashkimi Demokratik për Integrim (BDI) si pjesëmarrës në këtë koalicion, konsideron që zgjedhjet e parakohshme parlamentare mund të mbahen në prill të vitit 2024, bashkë me zgjedhjet presidenciale. BDI si pjesë e këtij koalicioni e përkrahë fuqishëm shumicën parlamentare, koalicionin qeverisës dhe jemi këtu për t’i realizuar këto projekte. Qytetarëve nuk iu duhet paparashikueshmëri, qytetarëve nuk iu duhen aventura të zgjedhjeve sepse ato ju duhen vetëm agjendave destabilizuese të rajonit që i bën dikush tjetër, por qytetarëve i duhet një qeveri e përgjegjëshme sociale që e dëgjon qytetarin dhe i realizon këto projekte”, tha Grubi.
