Ish-kryeministri Nikolla Gruevski gjendet në vilën e kryeministrit hungarez, Viktor Orban. Lajmi bëhet i ditur nga gazetarja e televizionit 1TV, e cila po qëndron në Budapest.
Siç bëhet e ditur, Gruevski po qëndron në vilën e kryeministrit Orban, ndërsa netët e fundit ka qëndruar në një hotel në kryeqendrën hungareze. Megjithatë ky lajm ka mbetur për tu konfirmuar zyrtarisht gjatë ditës së nesërme, pasi që është bërë i ditur nga informatorë të 1TV.
Viktor Orban është mbështetës dhe aleat i Nikolla Gruevskit dhe VMRO-DPMNE. Ai kishte shprehur hapur mbështetjen ndaj partisë opozitare maqedonase gjatë periudhës që ishte në pushtet, por edhe tani në opozitë, kur vetë Orban mbërriti në Shkup në zgjedhjet e fundit lokale për të shprehur mbështetjen për VMRO-DPMNE-në.
Gruevski dje bëri të ditur se është arratisur drejt Hungarisë, pas kërcënimeve që ka pasur periudhën e fundit. Ai ka theksuar se do të kërkojë azil politik, por do ti ngelet besnik kauzës për Maqedoninë.
Arratisja e tij pasoi pak ditë pasi që ishte shpallur vendimi për të vuajtur dënimin prej 2 viteve burg për rastin korruptiv “Tank” të hetuar nga Prokuroria Speciale, që ka të bëjë me blerjen e Mercedesit luksoz me vlerën prej 600 mijë euro, gjatë qeverisjes së kaluar.
