Humbje për Uashingtonin, rritet presioni: 16 ushtarë amerikanë humbën jetën në konfliktin me Iranin
Konflikti ndërmjet Shteteve të Bashkuara të Amerikës dhe Iranit vazhdon të shkaktojë viktima, ndërsa humbjet më të fundit po e shtojnë edhe më shumë presionin ndaj Uashingtonit. Komanda Qendrore e SHBA-së (CENTCOM) konfirmoi se dy pjesëtarë të forcave të armatosura amerikane humbën jetën gjatë një sulmi në Jordani, duke e çuar në 16 numrin e përgjithshëm të ushtarëve amerikanë të vrarë në këtë konflikt.
Lufta përhapet përtej fronteve të drejtpërdrejta
Incidenti i fundit tregon se përplasja ndërmjet dy fuqive nuk po zhvillohet vetëm në terren, por kryesisht përmes dronëve, raketave dhe sulmeve ajrore.
Forcat amerikane janë të dislokuara në disa pika të Lindjes së Mesme, për këtë arsye edhe vende të tjera të rajonit janë bërë objektiv i sulmeve iraniane pas dështimit të negociatave për paqe.
Presidenti amerikan, Donald Trump, kishte deklaruar më herët se ndërhyrja ushtarake ishte e domosdoshme për ta penguar Iranin të zhvillonte armë bërthamore.
Deri të shtunën pasdite, ai nuk ishte prononcuar për ushtarët amerikanë të vrarë së fundmi, ndërsa Shtëpia e Bardhë i udhëzoi mediat t’i referoheshin njoftimit të Komandës Qendrore të SHBA-së.
Viktimat e para amerikane në konflikt
Pak pas fillimit të luftës, më 28 shkurt, gjashtë ushtarë amerikanë humbën jetën gjatë një sulmi iranian me dron ndaj një porti civil në Kuvajt.
Ata ishin pjesëtarë të një njësie logjistike nga Ajova dhe punonin në një objekt të ngjashëm me një kontejner transporti, i cili nuk kishte mbrojtje të mjaftueshme.
Ushtari i shtatë amerikan ndërroi jetë më shumë se një javë pasi ishte plagosur gjatë një sulmi iranian ndaj bazës ajrore “Prince Sultan” në Arabinë Saudite, më 1 mars.
Konflikti ndërmjet Uashingtonit dhe Teheranit vazhdon të ngjallë shqetësime për një përshkallëzim më të gjerë në rajon. / Aktuale.mk
