Inter Milano ngushtoi diferencën në krye të Serie A në tre pikë pasi mposhti Empolin 3-1 në “San Siro”, duke zgjatur serinë e pamposhtur në kampionatin italian në 15 ndeshje
Fitorja 3-2 e Napolit ndaj Atalanta BC të shtunën do të thoshte që Interi nuk mund të lejonte asnjë hap fals kundër Empolit të renditur në mes të tabelës, një ekip që kishin mposhtur në katër përballjet e fundit direkte.
Gjithsesi, ndërsa dominuan posedimin në pjesën e parë, ata hasën vështirësi për të krijuar raste të pastra shënimi, duke u detyruar të godasin nga distanca. Nicoló Barella tentoi për të shënuar, duke provuar dy gjuajtje të fuqishme, por të dyja përfunduan mbi traversë.
Rastet më të mira të pjesës së parë i pat kapiteni Lautaro Martínez, i cili u ndal fillimisht nga Devis Vásquez me një goditje akrobatike dhe më pas goditi shtyllën nga një distancë prej rreth tetë metrash.
Ndërkohë, Empoli duket se ishte i kënaqur të frustronte kundërshtarët e tij sesa të krijonte probleme sulmuese, duke bërë që portieri i Interit, Yann Sommer, të mbetej spektator para pushimit nga pjesa e parë.
Interit i duhej pak magji për të zhbllokuar ndeshjen, dhe kjo erdhi nga sulmuesi Lautaro. Duke marrë topin rreth 25 metra larg portës, ai u pozicionua dhe lëshoi një goditje të fuqishme drejt këndit të sipërm të portës, dhe megjithëse Vásquez e preku topin, gjuajtja ishte tepër e fortë dhe precize dhe ai nuk mundi ta ndal.
Ai ishte pranë një goli të dytë menjëherë pas kësaj, por këtë herë portieri i Empolit reagoi mirë. Duke pasur parasysh ngarkesën e ndeshjeve për Interin, Simone Inzaghi bëri rotacion në formacion, duke futur në lojë edhe Henrikh Mkhitaryan.
Interi praktikisht vulosi fitoren kur Denzel Dumfries shënoi me kokë pas një goditjeje nga këndi te Kristjan Asllanit. Edhe pse përfundimi i pastër i Sebastiano Espositos kundër ish-klubit të tij ngushtoi rezultatin dhe i dha Empolit shpresë, një gol i Marcus Thuram pas një kundërsulmi të shpejtë i dha fund çdo shprese për një rikthim të pamundur të miqve.
Interi tani do të përqendrohet te ndeshja e mesjavës në UEFA Champions League kundër Sparta Pragës. Sa për Empolin, ata do të presin Bolognan javën e ardhshme, duke qëndruar një pikë mbi zonën e rënies pas dështimit të nëntë për të fituar në 11 ndeshjet e fundit të Serie A.
