Vincenzo Spadafora, ministri italian për Sport, i ka dërguar një letër presidentit të UEFA-s, Alexander Ceferin, të hënën, për të pyetur nëse finalja e Ligës së Kampionëve për 2020 e planifikuar për t’u mbajtur në Stamboll duhet të mbahet ose jo në këtë qytet.
Spadafora pyeti në letrën e tij drejtuar Unionit të Shoqatave të Futbollit Evropian nëse është e papërshtatshme të zhvillohet në Stamboll finalja e Champions League më 30 maj 2020, në dritën e veprimeve jashtëzakonisht serioze ushtarake që Turqia po bën në Siri ndaj popullatës kurde, njofton Klan Kosova.
Finalja e këtij viti për kampionatin më prestigjioz të futbollit në Evropë është planifikuar të zhvillohet në Stamboll, pasi çdo vit një qytet i ndryshëm evropian pret ngjarjen e rëndësishme sportive.
Spadafora tha se ndërhyrja e fundit e Turqisë në veriun e Sirisë është e dënuar ashpër nga Bashkimi Europian dhe e pyeti nëse UEFA është e gatshme të marrë në konsideratë masa serioze disiplinore kundër Turqisë duke anuluar finalen nga qyteti i Stambollit.
Në përgjigje të kërkesës së italianit, nënkryetari i UEFA-s, Michele Uva, tha se revokimi i finales nga një qytet është pa dyshim një veprim jashtëzakonisht serioz dhe për këtë arsye UEFA nuk është e gatshme të diskutojë një mundësi të tillë në kohën e tanishme.
Sidoqoftë, UEFA vuri në dukje se çdo veprim i tillë i mundshëm së pari duhet të diskutohet brenda Ekzekutivit të Shoqatës.
