Policia ka ngritur kallëzim penal kundër ish Avokatit të Shtetit, Agron Reçi. Kallëzimi i referohet dyshimeve se ai derisa ka përfaqësuar zyrën shtetërore të mbrojtjes juridike në Ohër, në të njëjtën kohë ka punuar edhe si avokat edhe pse aktivitetin e tij në cilësinë e mbrojtësit ligjor e kishte deklaruar të pezulluar. Reçi dyshohet për veprën penale “keqpërfaqësim” apo prezantim i rrejshëm.
“I dyshuari nga data 10.11.2020 kur ishte zgjedhur avokat i shtetit për rajonin e Ohrit detyrën e tij si përfaqësues dhe mbrojtës ligjor e ka pezulluar. Pavarësisht kësaj, ai në tre raste të udhëhequra në Gjykatën Penale të Ohrit është paraqitur si avokat i palëve, duke e fshehur faktin se angazhimin e tij si përfaqësues ligjor e ka pezulluar. Me këtë veprim ai ka përfituar në kundërshtim me ligjin”, thonë nga Ministria e Punëve të Brendshme.
Reçi më 10 nëntor 2020 me vendim të Qeverisë ishte emëruar Avokati i Shtetit për rajonin e Ohrit, ndërsa nga 18 prilli 2023 është emëruar Avokati i Shtetit. Me ndryshimin e Qeverisë , Reçi në gusht të këtij viti dha dorëheqje të parevokueshme nga pozita e tij. Gjatë mandatit të tij si Avokat i Shtetit, Reçi disa herë kishte akuzuar Qeverinë për mos respektim dhe zbatim të kërkesave të tij, posaçërisht në propozimet për shkarkimin e avokatëve në disa rajone përfshi edhe atë të Shkupit./Alsat.mk
