Propozimi i Partisë Demokratike Evropiane për anëtar të KSHZ-së Zulfi Adili është tërhequr nga gara për anëtar të KSHZ-së. Këtë për Alsat e konfirmojnë nga grupi parlamentar i opozitës shqiptare por edhe nga grupi parlamentar i VMRO-DPMNE-së. Lidhja Evropiane për Ndryshim pret që pas këtij hapi, Komisioni për Zgjedhje dhe Emërime të caktojë vazhdim të seancës për ditën e nesërme dhe të zgjedhë kandidatin e tyre për anëtar të KSHZ-së, Abdush Demirin. Çështja ishte problematizuar prej muajsh pasi opozita shqiptare këmbëngulte se i takon pozita e anëtarit në KSHZ me qëllim që procesin zgjedhor të jetë i besueshëm dhe fer. Ata kishin akuzuar ish kreun e Kuvendit Talat Xhaferi dhe kryetaren e Komisionit për Zgjedhje dhe Emërime Marija Georgievska për bllokim të qëllimshëm. /Alsat.mk
