Në këtë moment, veçanërisht në pjesët perëndimore dhe lindore të Republikës së Maqedonisë, ka reshje të rrëmbyeshme lokale shiu, bubullima dhe erë të fortë nga drejtimi jugor. Gjatë ditës së sotme (e enjte, 13 mars), reshjet do të pushojnë.
Deri të shtunën (15 mars), do të fryjë erë e fortë nga drejtimi jugor dhe jugperëndimor (herë pas here dhe lokalisht me shpejtësi deri në rreth 80 km/h). Edhe në Shkup dhe rrethinë herë pas here do të fryjë erë e fortë nga drejtimi jugor dhe juglindor.
Për shkak të rrjedhës së fuqishme ajrore nga jugu dhe jugperëndimi, nga Saharaja drejt Republikës së Maqedonisë po vazhdon transporti i pluhurit dhe rërës, duke bërë që atmosfera të jetë e dukshëm e turbullt dhe moti të jetë shumë i rëndë dhe i zymtë.
Sa i përket temperaturave, ato deri të shtunën do të jenë pranverore-verore dhe jashtëzakonisht të larta për këtë periudhë të vitit.
Përkatësisht, në shumicën e vendeve temperaturat do të kalojnë 20 gradë, ndërsa në shumë zona do të arrijnë deri në rreth 25 gradë.
Në rajonin e Vardarit pritet që temperaturat të arrijnë deri në rreth 30 gradë. Në Shkup, gjatë kësaj periudhe, temperatura do të ngjitet afër 30 gradëve.
