Për shkak të depërtimit të një vale shumë më të ftohtë nga veriu, sonte (e hënë, 17 mars) në mbrëmje dhe gjatë natës drejt së martës (18 mars), si dhe të martën, reshjet që priten do të kalojnë gradualisht në borë edhe në qytete, veçanërisht në pjesën perëndimore të vendit, duke krijuar shtresë dëbore. Fillimisht, kjo do të ndodhë në vendbanimet më të larta, në male dhe në qendrat e skijimit, e më pas edhe në disa qytete të pjesës perëndimore të Republikës së Maqedonisë.
Edhe në zonat më të larta të luginës së Shkupit, me këtë depërtim të ftohtë, priten reshje të lehta bore, ndërsa lokalisht mund të ketë edhe fjolla të dobëta bore në disa pjesë të ulëta të luginës.
E gjithë kjo do të shoqërohet me erë të përforcuar deri të fortë nga drejtimi verior (lokalisht me shpejtësi mbi 60 km/h).
Kjo valë e ftohtë do të ulë temperaturat me rreth, ose edhe mbi 20 gradë, në krahasim me ato që kemi pasur gjatë ditëve të kaluara.
