Në pritje të frutit më të mirë të kësaj stine, është mirë të dimë edhe disa prej vlerave ushqyese të hurmave në shëndetin tonë. Ato rriten në pemën e quajtur Kaki dhe e kanë origjinën nga kontinenti aziatik. Shpesh janë quajtur edhe “Pema e paqes” për shkak të mbijetesës së bombës në Nagasaki. Më poshtë do të mund të lexoni disa nga vetitë pozitive të hurmave në organizmin tonë:
Ndihmojnë në tretje dhe në jashtëqitje.
Në fakt, hurmat kanë aftësi shumë të mira laksative dhe ndihmojnë në jashtëqitje për shkak të përmbajtjes së lartë të tyre në fibra, por nëse ato konsumohen të papjekura mirë, pra të pasura me taninë, ato janë të dëmshme dhe e dëmtojnë këtë proces. Nëse konsumohen të pjekura, ato mund të jenë një kurë mjaft efektive në trajtimin e konstipacionit.
Forcojnë imunitetin dhe sigurojnë energji për organizmin.
Hurmat janë të pasura me vitaminë C, e cila njihet për vetitë e saj në mbrojtjen e imunitetit. Nga ana tjetër, ato përmbajnë sasi të lartë uji, sheqeri, vitaminash dhe mineralesh. Sasia e lartë e karbohidrateve tek hurmat i bën ato të dobishme në përfitimin e energjive të nevojshme për organizmin.
Lufton aneminë.
Në fakt, nuk ka studime të mirëfillta mbi këtë efekt, por thuhet se hurmat mund të stimulojnë eritropoezën (prodhimin e rruazave të kuqe të gjakut), si dhe prodhimin e hemoglobinës në sajë të shtimit të përthithjes së hekurit në zorrë përmes ushqimeve, duke çuar kështu në përmirësimin e shkallës së anemisë.
Luftojnë lodhjen, stresin dhe sëmundjet kardiovaskulare.
Është parë se hurmat kanë efekte pozitive në përmirësimin e lodhjes dhe stresit psikologjik, shkruan bota.al. Rrjedhimisht, si pasojë e efekteve të tilla pozitive, mendohet se ato ndihmojnë edhe në përmirësimin e sëmundjeve kardiovaskulare, në të cilat njihet se një nga faktorët shkaktarë është edhe stresi. Reduktimi i tij ka çuar në reduktimin edhe të sëmundjeve kardiovaskulare.
