Për një vizitë zyrtare ne Institutin e Trashëgimisë Shpirtërore e Kulturore të Shqiptarëve (ITShKSh), ka qëndruar një delegacion nga Komuniteti Shqiptarë i Selanikut, të cilët ishin të pritur nga Kryetari i ITShKSh-së Skender Hasani si nikoqir, dhe nga zëvendës kryeministri i parë i Qeverisë Izet Mexhiti, si i ftuar i veçantë. Sipas të gjithë të pranishmëve shqiptarët ngado që janë e sidomos ato në pozitat udhëheqëse duhet ta kenë barrë shtesë edhe çështjen e shqiptarëve në Greqi, dhe trajtimin e tyre.
“Kjo ngrehinë nuk është një objekt i thjeshtë, por në vete mbartë një histori të shqiptarëve të këtyre trevave. Shkupi dhe Selaniku gjatë rilindjes kombëtare shqiptare kanë qenë dy qendrat kryesore të cilat për fat të mirë, pas 100 e sa viteve po rikthehet me lidhjen e Institutit me Komunitetin Shqiptarë të Selanikut.”, tha kryetari i ITShKSh-së, Skender Hasani.
“Vizita e juaj në Shkup është një akt simbolik dhe shumë i rëndësishëm që na i kujton lidhjet e thella të cilat i kemi si shqiptarë, pavarësisht vendit ku jetojmë. Ky takim i sotëm me ju është një mundësi për të ripërtëri angazhimin, për të mbrojtur dhe për të promovuar trashëgimin tonë kombëtare e kulturore. Por edhe për ti thelluar lidhjet në mes shqiptarëve të cilët jetojnë në RMV, por edhe të atyre të cilët jetojnë kudo në botë.”, tha zëvendës kryeministri i Qeverisë, Izet Mexhiti.
Edhe Kryetari i Komunitetit të Shqiptarëve të Selanikut, theksoi se ndjehen të respektuar, nga porosit të cilat i morën nga vet Mexhiti, për kujdesin e tij, për çështjen shqiptare ne Greqi.
“Faktori shqiptarë është shumë i dobët kulturalisht, dhe nuk kanë aftësi shtetformuese, e kjo ndoshta ka edhe ca të vërteta për të shkuarën, por jo edhe për të tashmen, sepse vet prania e Mexhitit, tregon që shqiptarët nuk janë më ai komb i cili nuk di të ndërtoj shtet, sepse ne dimë të ndërtojmë jo vetëm shtetin tonë, por po tregojmë se mund ti ndërtojmë edhe shtetet tjera.”, tha kryetari i Komunitetit të Shqiptarëve të Selanikut, Luan Zyka.
Sipas të pranishmëve shqiptarët ku do që jetojnë ato janë një pasuri e madhe për vendet ku jetojnë, dhe se ruajtja e gjuhës, zakoneve dhe traditave tona kombëtare është një mision i përbashkët. Në fund mysafirët nga Selaniku ndanë edhe një dhuratë për zëvendës Kryeministrin Mexhiti në shenjë respekti.
