Kryetari i Komunës së Butelit, Darko Kostovski, ka nisur shënimin e Ditës së Alfabetit të Gjuhës Shqipe me një aktivitet të veçantë në shkollat fillore “Vizbeg” dhe “Petar Zdravkovski-Penko”. Ky eveniment u zhvillua në një atmosferë festive dhe bashkëpunuese, duke përfshirë nxënës dhe mësimdhënës nga këto dy shkolla fillore.
Gjatë këtij aktiviteti, Kostovski ka theksuar rëndësinë e ruajtjes dhe promovimit të diversitetit gjuhësor si pasuri e përbashkët e qytetarëve të komunës së Butelit. Ai uroi nxënësit dhe mësimdhënësit për këtë ditë të shënuar dhe shprehu mbështetjen e tij për projekte që avancojnë mirëkuptimin ndëretnik dhe bashkëjetesën.
“Sot në shkollat fillore komunale “Vizbeg” dhe “Petar Zdravkovski – Penko” shënuam Ditën e Alfabetit të gjuhës Shqipe. Unifikimi dhe standardizimi i alfabetit është një nga elementet bazë që ndërton ndërgjegjen kulturore dhe kolektive. Duke respektuar dallimet e njëri-tjetrit, ne konfirmojmë angazhimin tonë për ndërtimin e një jete më të mirë për të gjithë qytetarët dhe ndërtimin e një Buteli më të fortë, më të avancuar dhe më evropian. Dëshiroj të uroj të gjithë pjesëtarët e komunitetit etnik shqiptar në Komunën e Butelit për Ditën e Alfabetit dhe t’u bëj thirrje të gjithë qytetarëve që të angazhohemi me qëllim që të respektojmë bashkëjetesën për të cilën bashkë kujdesemi”, ka shkruar në faqen e tij në facebook kryetari i Butelit, Darko Kostovski.
Nxënësit e shkollave fillore “Vizbeg” dhe “Petar Zdravkovski – Penko” interpretuan poezi dhe këngë kushtuar Alfabetit të Gjuhës Shqipe, ndërsa mësimdhënësit ndanë histori mbi rëndësinë e kësaj dite në kulturën shqiptare. Ky aktivitet nënvizoi përkushtimin e komunës për të ndërtuar ura lidhëse mes komuniteteve dhe për të promovuar vlerat e bashkëjetesës dhe respektit të ndërsjellë.
