“Jemi të bindur se ura do të hapet dhe se kjo çështje është e Kosovës”, kështu ka deklaruar shefja e Grupit Parlamentar të Lëvizjes Vetëvendosje, Mimoza Kusari – Lila.
“Ka kaluar shumë kohë më parë kur nuk është pjesë e procesit të Berlinit dhe nuk mund të jetë. Natyrisht se në element të vlerësimit të rrethanave të sigurisë, Kosova bashkërendon aktivitetin dhe se policia bashkë edhe me institucionet e tjera të sigurisë, përfshirë edhe KFOR-in do të jetë në koordinim, por nuk është çështje me të cilën mund të diskutohet parimi i hapjes së urës”, ka thënë ajo për RTK.
Kusari – Lila shtoi se eskalimi i situatës nuk ka ndodhur nga vendimet e Qeverisë Kurti por nga grupet kriminale serbe. Ajo është pyetur për qëndrimet e Presidencës dhe Qeverisë për këtë çështje.
“I keni dëgjuar deklaratat e presidentes, ka qenë shumë e qartë për çështjen e Urës dhe mos përfshirjen e kësaj teme në dialog, ashtu siç në të njëjtin parim është Qeveria. Në aspektin parimor, vlerësues, institucional gjithçka është njëzëri”, u shpreh ajo.
Tutje ka shtuar se për çështje të tjera ka pasur dallime, por që sipas saj, fokusi i dy institucioneve mbetet rritja e mbështetjes ndërkombëtare.
Lila për deklaratat e Hovenier: Kemi dallime, por ka bashkëpunim të vazhdueshëm
Ajo ka komentuar edhe deklaratën e ambasadorit amerikan, Jeffrey Hovenier, i cili dje ka përsëritur se po përballen me sfida nga ana e Qeverisë, të cilat po ndikojnë “në cilësinë e partneritetit”.
“Ne e dijmë se kemi hasur dallime apo qëndrime të ndryshme në raport me disa lëvizje, në veçanti me katër komunat në veri të vendit. Këto kanë pasur të bëjnë me prezencën e kryetarëve në objektet e komunave, debatin e kohës së fundit në raport me urën; ku vendimet janë bazuar tërësisht në parime, në funksionimin e shtetit demokratik dhe shtrirjen e sovranitetit. Ka pasur dallime nga qëndrimet e QUINT-i dhe ambasadorët e shteteve tjera, por që ka pasur bashkëpunim dhe bashkërendim të vazhdueshëm”, ka thënë Kusari – Lila.
Në një lidhje direkte nga Çikago teksa ishte në punimet e Konventës Demokrate, komentoi ftesën për pjesëmarrje të kryeministrit Kurti nga Instituti Kombëtar Demokratik.
“Kryeministri ka pasur ftesë nga Instituti Kombëtar Demokratik, njëjtë siç kemi pasur ne përfaqësuesit politik. Gjithashtu ngjarjet në Çikago lidhen me mbarëvbajtjen e Konventës, nominimin zyrtar të kandidatëve demokrat për president dhe zëvendëspresident të Amerikës. Në margjina nuk mund të themi se kryeministri është takuar vetëm me disa senatorë dhe kongresmenë, për arsye se janë përfaqësues zyrtar të Dhomave ligjvënëse të Amerikës. Kaq ka pasur hapësirën kohore. Kryeministri mbrëmë është nisur për Kosovë dhe në aspektin e prezantimit politik mendoj se ka qenë tepër e rëndësishme të jetë këtu”, ka thënë tutje Kusari-Lila për RTK-në.
