Deputetët e LSDM-së, të mbështetur nga nënshkrimet e kolegëve të tyre nga PSDR, PLD, Aleanca e Shqiptarëve, PDSH, Besa, Alternativa dhe deputetët nga grupi i pavarur parlamentar i VMRO-DPMNE-së, këtë pasdite parashtruan kërkesë në Kuvend për të thirrur seancë urgjente për konfirmimin e vendimeve për shpalljen e gjendjes së jashtëzakonshme, për shkak të pandemisë së Kovid-19 nga ana e presidentit të shtetit.
Nisma u dorëzua në arkivat e Kuvendit, e pastaj do të dërgohet në zyrën e kryetarit të Kuvendit, Talat Xhaferi. Nuk ka asnjë informacion se si do të veprojë Xhaferi pas marrjes dhe shqyrtimit të nismës, për të cilin gjithashtu nuk ka afat të shkruar, në fakt, nëse do t’ia paraqesë atë deputetëve të tjerë dhe nëse dhe kur do të thirr seancë.
Ai dje nuk ka dashur të komentojë nismën, duke theksuar se dëshiron ta shohë atë së pari dhe pastaj të deklarohet vetë për të. Paraprakisht, qëndrimi i tij ishte se Kuvendi i shpërndarë nuk mund përsëri të mblidhet.
Kundër kësaj nisme u deklaruan nga partia opozitare VMRO-DPMNE, ndërsa BDI la hapësirë për të parë nismën dhe më pas të prononcohet, duke theksuar se vendime të tilla kërkojnë konsensus të përgjithshëm.
Kuvendi i Republikës së Maqedonisë të Veriut është vetëshpërbërë më 16 shkurt për shkak të mbajtjes së zgjedhjeve të parakohshme parlamentare më 12 prill, por ato u anuluan për shkak të përhapjes së koronavirusit.
