Zymi i Hasit u vizitua të shtunën nga shumë qytetarë vendas dhe të huaj. Këta u mblodhën me qëllim të zbulimit të shtatores së Gjergj Kastriot Skënderbeut e cila u vendos për nderë të 550 vjetorit të vdekjes së tij.
Kjo shtatore u financua tërësisht nga qytetarët e Zymit veçanërisht nga ata që veprojnë jashtë atdheut.
Mirëpo përfaqësues të institucioneve nuk i lanë vetëm hasianët gjatë festës.
Këtu erdhën edhe kryeparlamentari Kadri Veseli, Ministri i Kulturës, Kujtim Gashi, kryetari i Prizrenit Mytaher Haskuka si dhe personalitete tjera të njohura si Jahja Lluka, Frrok Gjergjaj e avokati Tomë Gashi.
Kryeparlamentari ,Kadri Veseli, u premtoi banorëve të Hasit se viti 2019 do të jetë vit i veçantë për shqiptarët.
“Qoftë myslimanë, qoftë katolikë, veç në Has ndihet plotësisht shqiptar çdo qytetar” tha Veseli.
Nuk munguan as këngë e valle nga trupa e valles nga Hasi, të veshur me veshjet kombëtare karakteristike të kësaj zone.
Ministri i Kulturës, Rinisë dhe Sportit, Kujtim Gashi, njoftoi se gjatë vitit të ardhshëm në Zym do të vendoset edhe një shtatore tjetër, ajo e shkrimtarit e veprimtarit të shquar, Pjetër Bogdanit.
Ndërsa nderi për zbulimin e shtatores iu dha Kadri Veselit, Jahja Llukës dhe një banori nga Zymi që jeton në Kroaci
Nderime u përcollën edhe nga garda ceremoniale dhe nga qytetarët tjerë nga komunat e Kosovës.
