Sot, pata nderin dhe kënaqësinë e madhe të mirëpres gjeneralin Wesley K. Clark, një figurë emblematike dhe hero për të gjithë shqiptarët. Si ish-Komandant Suprem i Aleatëve në Evropë i NATO-s nga viti 1997 deri në vitin 2000, gjenerali Clark ka pasur një rol kyç në çlirimin e Kosovës dhe në përpjekjet për pavarësinë e saj. Kontributi i tij i jashtëzakonshëm është shumë i çmueshëm dhe ka mbetur pjesë e rëndësishme e historisë tonë moderne.
Si zëvendëskryeministër i pare i ardhshëm i Maqedonisë së Veriut, përfaqësova jo vetëm koalicionin VLEN, por edhe ndjenjat dhe respektin e thellë që populli shqiptar në Maqedoninë e Veriut ka për gjeneralin Clark. Ai është një personazh që ka fituar zemrat tona përmes vendimeve të tij të guximshme dhe lidershipit të tij të jashtëzakonshëm gjatë periudhës kritike të Luftës së Kosovës.
Biseda jonë filloi me një reflektim të sinqertë mbi të kaluarën historike dhe të ndritshme të shqiptarëve. Gjenerali Clark ndau me mua kujtime dhe përvoja nga koha kur ai komandonte Operacionin e Forcave Aleate, duke nënvizuar rëndësinë e bashkëpunimit ndërkombëtar dhe angazhimit të NATO-s për të siguruar paqe dhe stabilitet në rajon. Diskutuam me detaje për sfidat dhe pengesat e asaj kohe, si dhe për triumfet që arritëm së bashku.
Një nga momentet më të veçanta të takimit ishte kur gjenerali Clark foli për mbështetjen e vazhdueshme të NATO-s dhe Shteteve të Bashkuara për popullin shqiptar, dhe për Maqedoninë e Veriut. Ai theksoi se uniteti dhe bashkëpunimi, janë çelësi për një të ardhme të ndritur dhe të suksesshme. Ky mesazh ishte shumë i rëndësishëm për mua, tash në kohën kur po e themelojmë qeverinë, duke na kujtuar se puna dhe përpjekjet tona për stabilitet dhe prosperitet duhet të vazhdojnë pandërprerë.
Pjesa tjetër e bisedës u përqendrua në të ardhmen e vendit tonë dhe në mundësitë e bashkëpunimit të mëtejshëm. Ne u dakorduam për rëndësinë e zhvillimit ekonomik, dhe të sigurisë në rajon.
Një nga pikat kyçe që u diskutuan ishte edhe integrimi euroatlantik i Maqedonisë së Veriut dhe rëndësia e vazhdimit të reformave të nevojshme për të arritur këtë qëllim. Gjenerali Clark shprehu mbështetjen e tij të plotë për këtë proces dhe ofroi asistencën e tij për të ndihmuar në realizimin e reformave kritike. Ai theksoi se Maqedonia e Veriut është në rrugën e duhur drejt integrimit të plotë, në strukturat euro-atlantike.
Takimi me gjeneralin Wesley K. Clark ishte jo vetëm një nder për mua personalisht, por edhe tejet i rëndësishëm.
Dhe kështu, Gjenerali Clark, një mik i madh i shqiptarëve, do të mbetet gjithmonë një simbol i shpresës dhe i guximit për ne. Ai na kujtoi se historia jonë është e mbushur me sakrifica dhe arritje, dhe se e ardhmja jonë është e ndritur nëse vazhdojmë të punojmë së bashku për një Maqedoni të Veriut dhe një Ballkan më të mirë dhe më të sigurt.
Falemnderit për viziten, Gjeneral🇺🇸 https://www.facebook.com/share/p/ttnaSzMU6WjGsnCA/?mibextid=oFDknk
