Sot pata kënaqësinë të marr pjesë në Konferencën e Ambasadorëve në Tiranë, një ngjarje e organizuar nga Ministri për Evropë dhe Punë të Jashtme të Republikës së Shqipërisë, z. Igli Hasani.
Gjatë panelit me temë “Hapësira shqiptare në gjeopolitikën e rajonit”, ndava pikëpamjet e mia mbi zhvillimet e fundit në skenën politike të Maqedonisë së Veriut. Theksova rëndësinë e ndryshimit të shumëpritur që solli krijimin e qeverisë pa BDI-në, një parti që për 22 vjet kishte monopolizuar politikën shqiptare, ndërsa partitë maqedonase ndryshoheshin vazhdimisht. Nënvizova se BDI-ja kishte ngulfatur skenën politike dhe pengonte çdo përpjekje për ndryshime pozitive për shqiptarët.
Gjithashtu, theksova se integrimi evropian mbetet prioriteti ynë absolut si koalicion, dhe se jemi të përkushtuar dhe të gatshëm të votojmë ndryshimet kushtetuese në çdo moment.
Përveç kësaj, përgëzova Ministrin Hasani për krijimin e një departamenti të veçantë në Ministrinë e Jashtme të Shqipërisë, dedikuar shqiptarëve të rajonit dhe diasporës. Për mua, thellimi i bashkëpunimit brendashqiptar është një domosdoshmëri që duhet të vazhdojë pandërprerë.
Në përfundim, nënvizova nevojën e krijimit të një platforme të përbashkët që të na bashkojë në fusha të ndryshme, nga arsimi deri te ekonomia, duke e cilësuar këtë si një element përcaktues për të ardhmen tonë të përbashkët. https://www.facebook.com/share/p/KB3LuGetCYTV6XFt/?mibextid=oFDknk
