Kryeministri Hristijan Mickoski, gjatë pjesëmarrjes së tij në emisionin “360 gradë”, duke folur për vizitën në SHBA me rastin e inaugurimit të presidentit të ri amerikan Donald Trump, theksoi se karakteri i takimeve të realizuara gjatë kësaj vizite ishte në nivelin më të lartë deri tani.
“Delegacioni ishte sa më i vogël që mund të jetë dhe, nëse e krahasoni me delegacionet e mëparshme, vërtet ishte më i vogli i mundshëm. Cilësia e takimeve ishte më e larta në krahasim me ndonjëherë tjetër. Po flas, nëse merret parasysh karakteri i vizitës, përmbajtja e saj, si dhe njerëzit me të cilët pata takime, gjë që u dëshmua jo vetëm gjatë vizitës, por edhe pas saj,” theksoi Mickoski.
Ai shtoi se për të personalisht ishte një nder i madh që procesin e inaugurimit e ndoqi së bashku me kryetarin e Partisë Republikane të SHBA-së, i cili aktualisht, në hierarki, është njeriu i dytë më me ndikim pas presidentit Trump.
“Për mua është një nder që këtë proces e ndoqa së bashku me kryetarin e Partisë Republikane, i cili, duhet thënë, më ftoi që në vizitën time të ardhshme, si shtetar dhe si kryetar partie, që do të zhvillohet në SHBA, të kemi një takim së bashku, gjë që për një shtet të vogël si i yni, do të thosha edhe gjeografikisht dhe gjeostrategjikisht, është një mundësi për të krijuar një komunikim të tillë,” theksoi Mickoski.
Ai gjithashtu shtoi se në takimet e realizuara në Uashington u diskutua për thellimin e bashkëpunimit dypalësh me SHBA-në, investimet në vendin tonë, si dhe për ambicien për t’u bërë pjesë e familjes evropiane.
“Në Uashington folëm për rëndësinë e Maqedonisë si shtet në rajon, për ambiciet tona si Qeveri, për projektet tona, për thellimin e bashkëpunimit dypalësh me SHBA-në, për mundësitë e investimeve tek ne, dhe sigurisht për rrugën drejt integrimit evropian dhe ambicien tonë për të qenë pjesë e familjes evropiane, si dhe për sfidat me të cilat jemi përballur dhe me të cilat përballemi. Prandaj mendoj se nuk kemi një shans të dytë për një përshtypje të parë, dhe është më së miri që të krijosh një përshtypje të parë kur një administratë fillon mandatin e saj,” theksoi Mickoski dhe shtoi:
“Po krijojmë lidhje vërtet të forta, miqësi që, besoni, janë shumë të rëndësishme për të ardhmen e shtetit.”
I pyetur nëse pret mbështetje nga ekipi përreth presidentit amerikan për rrugën eurointegruese të Maqedonisë në BE, kryeministri Mickoski u përgjigj se absolutisht pret mbështetje dhe se në këtë drejtim ishin të gjitha këto takime.
“Absolutisht, pikërisht këtë po them, se presim mbështetje konkrete me lëvizje të vërteta politike, dhe ta shohim. Nëse nuk provojmë, nuk do ta dimë. Detyra jonë është të provojmë, të shkojmë kudo në botë për të kërkuar mbështetje, për të krijuar miq, për të krijuar aleatë. Kjo është qëllimi ynë,” përfundoi Mickoski.
