Sot në Mal të Zi, Ministri i Bujqësisë, Pylltarisë dhe Ekonomisë së Ujërave, Cvetan Tripunovski, dhe Vladimir Jokoviç, Ministri i Bujqësisë, Pylltarisë dhe Ekonomisë së Ujërave të Malit të Zi, nënshkruan Protokollin për bashkëpunim shkencor, teknik dhe ekonomik në fushën e bujqësisë ndërmjet ministrive.
Sipas Protokollit të nënshkruar, të dy vendet do të bashkëpunojnë në fushën e bujqësisë (hortikulturë, blegtori, pemëtari, vreshtari dhe mbrojtje të bimëve), zhvillimit rural, veterinarisë, sigurisë ushqimore, industrisë ushqimore, ujërave dhe pylltarisë, duke mundësuar:
• Shkëmbim të informacionit shkencor dhe teknik dhe të dokumentacionit;
• Shkëmbim të rezultateve të kërkimeve të publikuara dhe të verifikuara nga institucionet kompetente, si dhe krijimin e aktiviteteve të përbashkëta direkte ndërmjet këtyre institucioneve;
• Shkëmbim të materialit gjenetik dhe biologjik në fushën e prodhimit bimor dhe blegtoral;
• Shkëmbim të përvojave në politikat bujqësore, tregtinë e jashtme, masat specifike për nxitjen dhe mbrojtjen e prodhimit, bujqësisë dhe eksportit të produkteve bujqësore;
• Mbështetje dhe angazhim të përbashkët në krijimin, sigurimin e fondeve për financim dhe realizimin e projekteve rajonale;
• Zhvillimin e organizatave të prodhuesve dhe shoqatave të fermerëve;
• Zhvillimin e shërbimeve këshillimore, etj.
Brenda një muaji nga nënshkrimi i Protokollit, do të krijohet një Grup Pune i përbashkët me detyrë të ndjekë dhe nxisë realizimin e bashkëpunimit në mënyrë të vazhdueshme.
Në mbledhjen e parë, anëtarët e Grupit të Punës do të vendosin për planin e aktiviteteve lidhur me fushat e bashkëpunimit të rënë dakord.
Grupi i Punës do të mbajë mbledhje të rregullta të paktën dy herë në vit, duke u alternuar në të dyja vendet.
Bashkëpunimi ndërmjet dy vendeve në fushën e bujqësisë, pylltarisë dhe ekonomisë së ujërave do të thellohet më tej në periudhën e ardhshme.
