Në periudhën në vijim pritet që Komisioni për Sëmundjet Infektive të vendosë për propozimin e Ministrisë së Shëndetësisë për mbajtjen e maskave në hapësira të mbyllura gjatë qëndrimit të gjatë, si dhe ajrosje të rregullt të hapësirave. Ky propozim i Ministrisë vjen pas rritjes së konstatuar të transmetimit të koronavirusit.
“Kur qëndroni në një hapësirë të mbyllur për një kohë të gjatë, duhet të mbahen maska, dhe personat nga kategoritë e rrezikuara duhet të mbajnë një maskë të paktën FPP2 ose H95 ose FFP3. Hapësirat në të cilat njerëzit qëndrojnë më gjatë (zyrat, klasat në kopshte, dhomat e mbledhjeve, etj.), si dhe ambientet sportive, duhet të ajrosen dhe dezinfektohen rregullisht. Të shmangen grumbullimet e panevojshme në grupe të mëdha dhe sa herë që është e mundur të ruhet një distancë prej dy metrash, janë rekomandimet nga Ministria e Shëndetësisë që i dërguan dje Komisionit.
Ministria dhe Komisioni po monitorojnë në mënyrë aktive situatën me Kovid-19 në vend, por edhe situatën në nivel evropian dhe global. Ndaj, siç thekson Ministria, edhe pse për momentin gjendja është relativisht e qetë, për të mbetur e tillë rekomandohet kujdes dhe marrja e masave për mbrojtje personale. Kjo vlen veçanërisht për të moshuarit, njerëzit që kanë një ose më shumë sëmundje kronike dhe këdo që ka imunitet të reduktuar për çfarëdo arsye.
Nëse qytetarët ndjejnë disa nga simptomat standarde (kollë e thatë, temperaturë, dhimbje fyti, dhimbje muskulore etj.) duhet të kërkojnë menjëherë ndihmë nga mjeku amë dhe duhet të vendosin maskë.
Numri i termineve për testimin e pacientëve tashmë është rritur në qendrat shëndetësore anembanë vendit, ndërsa vetëm në Shtëpinë shëndetësore – Shkup testimi bëhet në pesë pika. Sipas Ministrisë, vaksinimi kundër Kovid-19 mbetet mbrojtja më efektive kundër zhvillimit të formave më të rënda të Kovid-it dhe shtrimit në spital.
Tërësisht të mbrojtur, siç thuhet nga Ministria, llogariten ata që kanë marrë dy doza të vaksinave dhe një shtesë, d.m.th. dozë përforcuese. Të gjithë ata që nuk janë vaksinuar ose që nuk kanë përfunduar të gjithë ciklin e vaksinimit, rekomandohet të bëjnë të njëjtën gjë menjëherë dhe për ata që kanë kaluar katër muaj nga doza përforcuese, rekomandohet edhe një përforcues i dytë.
Ndryshe, detyrimi për mbajtjen e maskave në transportin publik, institucionet shëndetësore, barnatore dhe shtëpitë e të moshuarve është ende në fuqi.
Në mbledhjen e mbajtur të enjten, Komisioni për Sëmundje Infektive deklaroi se vendi ndodhet në një zonë të gjelbër me ambiente të mjaftueshme për kujdesin ndaj pacientëve dhe nuk nevojiten masa kufizuese shtesë.
Në këtë takim është diskutuar edhe çështja e disponueshmërisë së testeve për Kovid-19, me rekomandim për dyfishimin e kapaciteteve testuese të institucioneve përgjegjëse për të.
Rritja e numrit të rasteve të reja, sipas Ministrisë, është 79,9 për qind.
