Deklaratat publike që ofendojnë ose provokojnë Maqedoninë e Veriut janë absolutisht të papranueshme dhe kundërproduktive dhe nuk përfaqësojnë qëndrimin zyrtar të shtetit bullgar dhe nuk mund të interpretohen si të tilla, thonë nga Ministria e Punëve të Jashtme bullgare, përcjell Telegrafi Maqedoni.
Siç thuhet në njoftimin e publikuar në faqen e Ministrisë së Punëve të Jashtme të Bullgarisë, Ministria konfirmon qëndrimin e saj kategorik se politikanët dhe figurat publike nga Bullgaria dhe Maqedonia e Veriut kanë një rol të përgjegjshëm në ndërtimin e besimit dhe zhvillimin e marrëdhënieve të mira fqinjësore midis dy vendeve si dhe në uljen e tensioneve në publik.
“Duke marrë parasysh historinë e përbashkët që lidh të dy vendet, përkujtimi i ngjarjeve dhe personaliteteve të përbashkëta historike, siç është përvjetori i vdekjes së Mara Bunevës, duhet të çojë në forcimin e besimit dhe fqinjësisë së mirë”, thuhet në deklaratën e MPJ-së bullgare.
Sipas Ministrisë, siç njofton “BTA”, në të njëjtën kohë, jo më pak të rrezikshme për marrëdhëniet dypalëshe janë edhe apelet e “partive margjinale në Maqedoninë e Veriut kundër politikanëve dhe figurave publike bullgare që mbrojnë të drejtat e bullgarëve në Maqedoninë e Veriut dhe projektet e afrimit të njerëzve mes dy vendeve”.
