Në Gjykatën e Apelit sot duhet të mbahet seancë për ankesën i ish-ministres së Punëve të Brendshme, Gordana Jankullovska për aktvendimin e shpallur ndaj saj në rastin “Tank” ku ajo është e dënuar me gjashtë vite burg. Aktvendimin për furnizimin e mercedesit e solli këshilli gjyqësor në krye me gjykatësen Dobrilla Kacarska me 8 tetor të vitit të kaluar.
Gjykata e shkallës së dytë mund ta konfirmojë vendimin e shkallës së parë, ta ndryshojë ose ta kthejë lëndën në rigjykim.
Nëse Gjykata e Apelit e konfirmon dënimin, aktvendimi bëhet i plotfuqishëm dhe Jankullovska duhet ta vuajë. Megjithatë, në rast të tillë ish-ministrja mund të kërkojë shtyrje të kryerjes së dënimit deri sa fëmija i saj të mbushë një vjet (deri në qershor të këtij viti) që është e lejuar sipas Ligjit për kryerjen e sanksioneve.
Së bashku me Jankullovsën në këtë rast gjykoheshin edhe ish-kryeministri Nikolla Gruevski dhe ish-ndihmës ministri në MPB, Gjoko Popovski, por për shkak shtatzënisë së rrezikshme, procedura u veçua për Jankullovskën.
Gruevski dhe Popovski tashmë janë të dënuar me vendim fuqiplotë: ish-kryeministri me dy vjet burg, ndërsa ish-ministri në MPB me katër vjet e gjashtë muaj. Popovski ndodhet në burg, ndërsa Gruevski ka ikur në Hungari, ku ka fituar azil politik.
