Shqipëria luan ndaj Skocisë ndeshjen e fundit në grupe të Nationas League. Shanset për kualifikim tashmë janë kompromentuar, do të duhet një mrekulli, nga ato që ndodhin rrallë në futboll.
Një fitore 4-0 e kuqezinjve në “Loro Boriçi e ndërthurur me një sukses minimal të skocezëve ndaj Izraelit tri ditë më pas do të thoshte një mrekulli për kuqezinjtë.
Presidenti Duka ishte i qartë: nëse fitojmë dhe e mbyllim grupin me pikë të barabarta me rivalët, nuk mund të konsiderohet një dështim. E lexuar mes rreshtave, një fitore i lejon trajnerit të tentojë kualifikimin në Evropian edhe nëpërmjet kualifikueseve.
Çfarë ndodh me një humbje? Vendi i fundit dhe rrëzimi nga liga do të linte pak vend për përkufizimin e kësaj aventure. Gjithsesi, nuk luhet për Panuccin, Shqipëria luan fatin e saj. Luhet për të kthyer besimin dhe prestigjin, me epokën post-De Biasi që po rezulton vërtet e vështirë. Shqipëria ka fituar vetëm një ndeshje në shtatë takime të luajtura gjatë vitit 2018.
Klima nuk është më e mira, por për lojtarët rezultatet e fundit mund të shërbejnë për të shtrënguar fort dhëmbët dhe provuar deri në fund këtë herë.
Evropiani është aty, për t’u tentuar edhe nëse nuk hyhet nga dera e Nations League, por bazat për të ardhmen hidhen që tani.
Në “Hampden Park” Shqipëria humbi 2-0, me pengjet e një goli jashtë loje dhe sidomos për shanset e shpërdoruara para portës.
Këtë herë nuk do të jenë Migjen Basha dhe Elseid Hysaj, krijuesi i lojës dhe një lider i mbrojtjes dhe i gjithë skuadrës.
Skocia nuk është një kundërshtar i pakalueshëm. Në “Loro Boriçi” luhet për të tashmen dhe të ardhmen.
