Një 48-vjeçar është vrarë në mbrëmjen e së hënës në Kaçanik, ka bërë të ditur Policia, pas hetimeve fillestare të ngjarjes. Siç thuhet në komunikatë, viktima është gjetur pa shenja jete në një veturë në magjistralen Ferizaj-Kaçanik, në Kaçanik të Vjetër.
“Nga hetimet e para, ekzaminimit të vendit të ngjarjes dyshohet se personi/persona të panjohur në Kaçanik të Vjetër nga afërsia kanë shti breshëri plumbash mbi automjetin dhe shoferin e më pas janë larguar nga vendi i ngjarjes në drejtim të panjohur. Jo larg vendit të ngjarjes në fshatin Soponicë të Kaçanikut është gjetur edhe një automjet tjetër i udhëtarëve i përfshirë nga flaka, ku ekziston dyshimi se personat e dyshuar pasi e kanë kryer vrasjen në Kaçanik të Vjetër i kanë vënë flakën automjetit dhe janë larguar”, thuhet në njoftim të Policisë.
Trupi i pajetë i viktimës N.C. 48-vjeçar është dërguar në Institutin e Mjekësisë Ligjore në Prishtinë për obduksion.
