Punonjësit e pesë universiteteve shtetërore, “Nënë Tereza”, “Universiteti I Tetovës”, “Goce Dellçev” Shtip, “Shën Klimenti i Ohrit” Manastir dhe “Shën Apostol Pavle” Ohër shprehen të revoltuar dhe të diskriminuar që nuk fituan rritje pagash për 22 %, siç fituan kolegët e tyre nga Universiteti “Shën Kirili dhe Metodi” Shkup, të cilët paraprakisht nënshkruan Marrëveshjen Kolektive me ish kreun e Kuvendit, Talat Xhaferi më 29 dhjetor 2022. Nga Sindikatat e pesë universiteteve kujtojnë se propozim-teksti i Marrëveshjeve Kolektive prej të gjitha universiteteve publike është dorëzuar me kohë në Kuvend por asnjëherë nuk morën përgjigje pse të njejtat nuk u firmosën me themeluesin, në këtë rast Kuvendin. Avni Avdiu, kryetar I Sindikatës së Universitetit “Nënë Tereza” tha për Alsat se do të shfrytëzojnë të gjitha masat për përfitimin e kësaj të drejte. Madje, sot në Qeveri, Avdiu tha se dorëzuan kërkesë për takim me kryeministrin teknik, më së voni deri te shtunën.
“Do të kërkojmë sqarim se pse erdhi deri te kjo, pse ne nuk u ftuam dhe çka tutje dhe të shohim me të gjithë mekanizmat se çfarë hapsire ose vrime ligjore ka që edhe për ne të vlej ajo që vlen për UKIM-in. U diskutua që ti drejtohemi Gjykatës Kushtetuese që këtë vendim ta shtrij edhe tek ne, pastaj komisionit për anti korrupsion dhe format më radikale janë edhe protestat, grevat mirëpo nuk do të kishim dashur të shkonim deri tek ato për shkak të atmosferës së zgjedhjeve dhe të mos mer kahje politike gjithë ky problem”, deklaroi Avni Avdiu, kryetar i Sindikatës së Universitetit “Nënë Tereza”.
Në seancën e findit, Qeveria shqyrtoi dhe miratoi nënshkrimin e Marrëveshjes Kolektive mes Sindikatës së Universitetit “Shën Kirili dhe Metodi” në Shkup dhe kryetarin e Kuvendit. Sipas konkluzioneve të qeverisë, punonjësit e Universitetit “Shën Kirili dhe Metodi” nga ky muaj do të marrin paga më të larta për rreth 22 për qind dhe do t’u paguhet diferenca për muajin janar në mënyrë retroaktive. Sipas Ministrisë së Arsimit dhe Shkencës, gjithsej 3.000 profesorë, asistentë, persona administrativë dhe teknikë do të përfshihen me këtë rritje pagash. /Alsat.mk
