Zëvendëskryetari i Qeverisë i obliguar për Çështje Evropiane, Bujar Osmani, si koordinator kryesor i shtabeve të krizës të njësiteve të vetëqeverisjes lokale për mbrojtje nga Kovid-19 sot nga Struga theksoi se shteti po përpiqet të gjejë mënyrë të kthehet gjendja në shoqëri në një normalitet të ri, ndërsa njëherësh t’u mundësohet besimtarëve t’i praktikojnë nevojat e tyre, duke i respektuar masat mbrojtëse.
Osmani pas takimit me përfaqësuesit e Shtabit të krizave në komunën e Strugës në të cilën morën pjesë edhe kryetari i saj Ramiz Merko, si dhe përfaqësues të bashkësive fetare më të mëdha e potencoi nevojën që të ndalojnë sulmet mbi bashkësitë fetare në situatën e jashtëzakonshme të imponuar nga epidemia e koronavirusit.
Për Liturgjinë e mbajtur në Strugë, Osmani tha se bëhet fjalë për ngjarje që në dukje ka qenë kanosje e drejtpërdrejtë e strategjisë shtetërore për luftë kundër pandemisë, me mundësi për rrezikimin e shëndetit të besimtarëve të cilët kanë marrë pjesë, por edhe të shëndetit kolektiv dhe politikave që sa më parë të dilet nga kjo gjendje.
“Nuk jemi këtu për të identifikuar përgjegjësi, atë e bëjnë institucionet e tjera, këtu jemi për të biseduar se si të kthehemi në normalitetin e ri që ngadalë duhet ta arrijmë pas pandemisë. Njëherësh ta ruajmë shëndetin që t’u mundësojmë besimtarëve t’i kryejnë lutjet e tyre”, tha Osmani.
Ai theksoi se kjo nuk është e lehtë pasi grupimi, afrimi janë esencë e lutjeve fetare, që është diametralisht e kundërt me masat kundër koronavirusit, por njëherësh duke treguar se duhet të gjendet mënyrë se si të mundësohet praktikimi i lutjeve fetare por edhe të kujdesemi për shëndetin, duke i respektuar rekomandimet e institucioneve.
“Besimtarët nuk janë kriminelë, nevoja e tyre për kthimin e lidhjes me fenë nuk është krim. Shteti obligohet të përgatisë një paketë masash ndërsa bashkësitë fetare t’i respektojnë. Mbase është dashur edhe koordinim më i mirë i bashkësive fetare me shtetin në kohën kur janë sjellë vendime të caktuara, por realiteti tani është i tillë, vendimi është sjellë duke iu përshtatur situatës. Detyrë e imja është të jem në bashkëpunim të afërt me të gjitha bashkësitë fetare, që të mund ta mbrojmë shëndetin e njerëzve gjatë lutjeve fetare”, tha Osmani, duke e theksuar nevojën e respektimit të masave, koordinimin e të gjithë aktorëve në shoqëri me çka do të eleminoheshin çfarëdo perceptimesh për ekzistimin e ndonjë rivaliteti fetar në masat.
Sa u takon pritshmërive për uljen e masave restriktive, ai sqaroi se vendimi do të merret në pajtim me parametrat e caktuara në mënyrë të saktë, ndërsa sipas kalkulimeve politike.
“Katërmbëdhjetë ditë me radhë me më pak se pesë për qind raste pozitive të koronavirusit prej numrit të të testuarve. Kemi pasur situatë 13 ditë numri i rasteve pozitive të personave të testuar të jetë nën pesë për qind, që më pas ky numër të rritet. Tani duhet të shihet nëse është devijim momental apo trend i cili vazhdon”, sqaroi Osmani. shk/
