Kandidati shqiptar për president, Bujar Osmani ka dënuar sulmet ndaj mediave dhe fjalës së lirë. Osmani shkruan se, kohët e fundit ka një tendencë shqetësuese ku mediat e pavarura po përballen me presione të padrejta nga disa individ dhe parti.
“Si Ministër i Jashtëm i Maqedonisë së Veriut dhe mbështetës i vlerave demokratike, dënoj fuqishëm këto veprime.
Qeveria jonë ka qenë mbështetëse e palëkundur e lirisë së medias, një fakt që është njohur dhe është përshëndetur nga organizatat ndërkombëtare të medias. Liria e medias është një shtyllë themelore e demokracisë.
Përpjekjet për të ushtruar presion mbi mediat e pavarura janë jo vetëm të dëmshme për komunitetin gazetaresk, por edhe për publikun, i cili meriton qasje në informacione të paanshme dhe të larmishme.
Veprimet e tilla janë një kujtesë e censurës, e cila është thelbësisht kundër vlerave bazë evropiane që ne përpiqemi t’i promovojmë.
Vetëm përmes fjalës së lirë mund të sigurojmë një shoqëri vërtet demokratike”, thuhet në reagimin e kryediplomatit Osmani.
